أفضل طرق تغذية الطفل

يعنى ايه نعود الطفل على الاكل؟!!!
يعني الطفل بيكون مش عاوز و احنا بنحاول نضغط عليه....
الطفل اللي أول ما يشوف الاكل ده يقعد  يصقف و يخلص الاكل ده مش موجود... 😊
لازم نتعب مع الطفل شوية و نحاول مرة واتنين و عشرة لحد ما يبدء يستقبل الاكل كويس...

لو ادينا الطفل نوع اكل و محبهوش نستني شوية و نعرضه تاني لان اعصاب التذوق عند الطفل بتتغير كل  أسبوعين و ساعات  كمان بتتاثر بأعراض البرد او التسنين عند الطفل...
بنحاول ننوع في الأكل علشان الطفل ميزهقش.....
بنحاول نثبت مواعيد الاكل علشان جسم الطفل يتعود على كده و يبدأ يطلب الاكل في المواعيد دي...
بعد  السنة معندناش موانع في الاكل
الطفل ياكل معانا بلاش الاكل  بتاعة اللي طعمه مش  حلو ده ..

ياكل معانا بملح و سكر وو توابل بس  في المعقول.....
لازم يكون الاكل مفيد يعني خضار و  فاكهة و منتجات الألبان والبروتين.

اطفال كتير بسألهم مش بتاكل ليه  يقولي علشان مش عاوز اتخن 😕😕
اه والله بيقولولي كده
بلاش الكلام عن الدايت و عاوزين نخس علشان جسمنا بقي وحش قدام الولاد علشان بيتأثروا بالكلام ده...
بلاش حلويات و مواد حافظة كتير علشان بتسد نفس الاطفال..

وبلاش اكل قدام التلفزيون.....
لازم نتعب مع ولادنا شوية الموضوع مش سهل بس والله كله بيهون في  الاخر لما نلاقي صحة اولادنا كويسة 😊 😊

دكتور حاتم فاروق 

علامات خطرة عند الطفل

المقال ده مهم جدا يا جماعة ولازم كلنا نقراه كويس....
المقال ده هنتكلم فيه عن العلامات الخطيرة اللي لو شفتها على الطفل لازم اهتم بيها و أتحرك بسرعة علشان اطمن علي ابني... 👀👀

- بكاء حاد. او الطفل مش قادر يعيط. او بكاء متصل غير اللي انا متعود عليه من ابني..

- نقص الاستجابة.... الطفل مش مركز. مش واعي. كسلان بزيادة علي غير عادته.

- انتفاخ فتحة النافوخ... الاطفال في السنة الاولي بتكون في حتة طريه في نافوخه لو لاقيتها مرتفعة او عالية عن مستوي راسه تبقي دي علامة خطيرة.

- صعوبة في التنفس. يعني الطفل عمال ياخد نفسه بالعافية و عمال ينهج. او ينت في النفس و صدره طالع نازل.

- قئ مستمر ولو نازل فيه لون غامق اصفر او اخضر.

- حرارة عالية فوق 38 للاطفال اصغر من تلت شهور او اكتر من 39 للأطفال الاكبر..

- طفل يكون جسمه سخن و أطرافه ساقعة او مزرقة.

- طفل بيتشنج او فاقد الوعي او التركيز او مش قادر يصحي من النوم.

- طفل مش قادر يستحمل الضوء.

- طفح جلدي احمر مزرق و مبيختفيش لما اضغط عليه...

لو حسيت ان في حاجة من الأعراض دي عند ابنك لازم تهتم و تتحرك بسرعة للدكتور علشان يطمنك عليه و يعمل اللازم للحفاظ علي سلامته....
القلق احسن ميت مرة من الندم
لازم نركز مع ولادنا علشان نقدر نحافظ عليهم 😊
ربنا يحفظ ولادنا....
دكتور حاتم فاروق 

الاسهال عند الأطفال - طرق علاجه

ازاي اتعامل مع الطفل اما يجيله اسهال

اما الطفل يجيله اسهال لازم ناخد بالنا علشان ميحصلش جفاف 🤔🤔
علشان الجفاف بيحصل لما السوايل اللى تخرج من الجسم تبقى اكتر من اللى تدخل 👌👌
طيب
نعرف الجفاف ازاى؟!!!
تلاقى جلد الطفل كرمش عينه دخلت لجوا ريقه ناشف و ملهوف على الشرب 🤒🤒

طب ايه الحل؟ 🤔🤔
اول حاجة اشوف فيه ترجيع ولا مفيش علشان لو فى ترجيع نحاول نوقفه الاول بان احنا نقلل السوايل اللة الطفل بيشربها فى المره الواحدة
يعنى اديه شوية صغيرين اول باول بلاش كميه كبيرة مرة واحدة
وممكن اديه دوا للترجيع او حتى حقنة 💉💉💊💊

و بعدين ابدء اعالج الاسهال و اشرب الطفل سوايل
اهم سوايل ممكن يشربها هى اكياس محلول الجفاف
ايوا هى
اه اللى طعمها وحش و الطفل مبيرضاش يشربها
هى دى
اصبرى عليه شوية و هو هيخدها
هاتيله اللى بالبرتقال دى و نبردها فى التلاجة شوية و بعدين نديهاله هيشربها ساعتها
بوصى يا مدام  👀👀
هنحلى الكيس فى 200 سم ميه و نديها للولد ببطء
احنا مش مستعجلين
يعنى كل دقيقتين معلقة
يشرب لحد ما يرتوى بس ببطء
و نشوف نوع الاسهال
يعنى لو ريحته وحشة و ممخط او معرق بدم يبقى طفيلى ندى مثلا فلاجيل او نيتاذود
لو مفيهوش ريحة خالص و ميه كتير اوى يبقى فيروسى ساعتها نكتفى بالمحلول
اما بقى لو معاه حرارة عالية ويحته وحشة برده يبقى غالبا بكتيرى و محتاج مضاد حيوى جنب ادوية الاسهال
متنسوش المحلول 😊😊
دكتور حاتم فاروق 

بداية الاكل الصلب للطفل

انا عارف ان في اطفال بتكون متعبة في الاكل. 😏
اللي بيقفل بقه و اللي بيحوش الاكل جوه و اللي بعد ماا يخلص الاكل كله و اول ما امه تبتسم انها خلصتله الاكل يقوم مرجع الاكل كله 😇😯


علشان كده في امهات كتير بتستسهل انها تدي الطفل الاكل مضروب في الخلاط لحد سن كبير...
علشان الطفل مش بيرضي ياخد غير بالطريقة دي....
بس انا بقولك ان ده غلط و مينفعش ان احنا نستمر  فيه
من سن تسع شهور لازم الطفل يتعود  انه ياكل اكل مهروس
اكل صلب علشان يتعود يمضغ وده هيكون مفيد ليه و لتغذيته .... 👍👍


معلش اتعبي معاه شوية كمان  😊 😊
عوديه انتي علي الصح متخليش الطفل هو اللي يعودك 😊

دكتور حاتم فاروق 

علامات مهمة لو حصلت للطفل لازم نهتم

دي شوية علامات لو شوفناها علي الطفل لازم نتحرك و نعرضه علي الدكتور...
ها جاهزين؟؟ 👂👂👀

- طفل لسة مولود و معملش حمام براز في اول 36ساعة
- طفل رافض رضاعة مع سخونية و نهجان.
- طفل عنده خمول و كسلان و لونه بقي اصفر او ازرق.
- طفل عمره شهرين ونص و مش بيبتسم اما حد يلاعبه.
- طفل اربع شهور و مش بيصلب راسه.
- طفل في حول في عينه وهو اكبر من 6 شهور.
- طفل مش بيقعد لواحده اكبر من 9 شهور.
- طفل مش بيمشي و اكبر من سنة و نص.
- طفل اكبر من  سنه ومش بينطق ولا كلمه.
- طفل حصله سخونية و تشنجات اتكررت اكتر من مرة او  قعدت اكتر من 10 دقايق.
- طفل عنده امساك مصحوب بترجيع اخضر او انتفاخ.
- طفل اتعرض لخبطه في الراس عملتله فقدان للوعي او    ترجيع او تشنجات...
خلي بالكم.......
كفاية كده نحفظ دول دلوقتى......... سلام 😊
دكتور حاتم فاروق 

الحساسية عند الطفل... الوقاية منها و طرق علاجها.

الحساسية عند الطفل 

سواء كانت حساسية صدر او انف دي من اكتر الامراض المزعجة للطفل والاهل 

المشكلة انها بتكون عبارة عن ادوار متكررة كل شوية الطفل تعبان.... كحة و برد و صعوبة في التنفس و ساعات حرارة. مشكلة يتحصل كل فترة و بتحتاج ادوية كتير علشان تتحسن. 

اول حاجة لازم نعرفها ان في الاول مهم جدا ان احنا نفرق بين دي حساسية صدر او انف علشان بتختلف في العلاج.. 

اولا مهم ان احنا نحاول نمنع المسببات الاول. 

يعني بلاش الطفل يتعرض لروايح جامدة... تدخين برفانات بخور.... اي ريحة جامدة بلاش 

نحاول برده نمنع الطفل من الاماكن اللي فيها اتربة و غبار. 

بلاش يلعب مع الحيوانات اللي بتطلع شعر زي القطط او الطيور اللي ممكن تساعد ان صدرة يقفل. 

نحافظ عليه من البرد قدر الامكان 

نغذية كويس

ندية تطعيماته خصوصا تطعيم الإنفلونزا. 

نبعده عن اي طفل مريض علشان نتفادي العدوى.... 

بالنسبة بقي للعلاج :

في نوعين من الادوية : 

- ادوية علاجية... و دي ادوية بنديها للطفل اما يكون عيان زي موسعات الشعب و ادوية الحساسية و ساعات بنحتاج ندي نسب من الكورتيزون حسب حالة الطفل. 

- ادوية وقائية : ودي ادوية بنديها للطفل اما يكون كويس علشان نطول الفترات بين الادوار  ... ودي حاجات كتير اهمها مجموعة الموتيلوكاست زي السنجيولير و البدايل بتوعة. 

و ساعات بنحتاج ندي الطفل بخاخات ودي الحل الافضل لانه بيجيب نتيجة هايلة و بأقل أثار جانبية ممكن تحصل للطفل 

وبرده في بخاخات علاجية و بخاخات وقائية... 

ونعمل حسابنا ان الحساسية دي لو اتعاملنا معاها كويس هيفرق معانا جامد و هنحس بتحسن قوي للطفل و ان الادوار مش بتتكرر معاه كتير.. 

وفي ساعات حساسية بتكون مؤقتة بتنتهي علي سن 6 سنين 

مهم اوي الوقاية و مهم اوي الانتظام علي العلاج.... 

افضل طرق التعامل مع العصبية عند الاطفال

العنف عند الاطفال.....
موضوع مهم جداً و منتشر الفترة الاخيرة خصوصا فى المدارس....
ابني او بنتي اما بيضربوا زمايلهم و اما زمايلهم بيضربوهم
حاجتين اسوء من بعض....
لو ابني عنيف مع زمايله لازم اعرف ان العنف ده نتيجة اسباب كتير .

الطفل ده بيخرج طاقة مكبوتة داخله نتيجة تعرضه هو للعنف اما من الاب و الام او الاخوات او لكثرة المشاكل المنزلية امامه او من ضعف الاهتمام به فبيكون عاوز يظهر امام زمايله بانه قوي و يكون محط اهتمام من حوله و ساعات برضه بيحصل مع الطفل لعدم الفهم زي ما يلاقي الناس ضحكت ساعة ما هو ضرب ابوه او امه فبيقتكر ان ده حاجة عادية.

الطفل ده علاجه و التعامل معاه لازم يكون بأزالة السبب
يعني بلاش عنف معاه في البيت من الاب او الام او الاخوات و لازم نعطيه جزء كبير من الاهتمام و المودة و التوجيه.. بلاش يتفرج على الافلام اللي مليانه عنف و ساعات بيجيبوا اطفال مشاغبة على اساس انهم حاجة ظريفة و كده......

والطفل ده في الغالب بيختار طفل اقل منه في التكوين البدني او في السن علشان يمارس معاه العنف زي ما بيحصل معاه من الاكبر منه...
الطفل التاني ده بيكون ابنك اللي بيضرب.... ايواان

ابنك مينفعش يكون ملطشة لاي طفل عنده مشاكل نفسية
لازم يقدر يدافع عن نفسه.
لازم ميكونش فريسة سهلة للطفل المشاغب
عوديه يعرف يتصرف
عوديه يعرف ياخد حقه بنفسه من غير ما حد يجيبهوله.
موضوع اشتكيه للمس ده انسيه
المس اصلا مش هتعرف تعمل حاجة و الولد هيتسلي عليه كل شوية.....
عوديه ميخافش.... يزعق في و ش الولد و يهدده انه مش هيسمحله انه يعمل معاه كده تاني...
علميه يدافع عن نفسه و يزق ايد الولد العنيف بعيد عنه...
الطفل التاني ده جبان هو بس مستضعف ابنك....
عوديه انه ميسبش حقه علشان الالم البدني بيخف بسرعة لكن الالم النفسى بيعلم مع الوقت بالسلب....
علميه يعرف ياخد حقه بذكاء من غير ما الموضوع يكبر
عززي ثقته فى نفسه و انه متميز......
ربنا يحفظ ولادنا جميعا..
دكتور حاتم فاروق 

ارتفاع درجة حرارة الطفل

ارتفاع درجة حرارة الطفل من العلامات المهمة اللى لازم نتعامل معاها باهتمام و حرص لحد ما ارتفاع الحرارة يستقر
المهم ان احنا نحافظ علي درجة حرارة الطفل فى حدود الطبيعى لحد ما سبب الحرارة يتعالج و الطفل يرجع لحالتة الطبيعية
الفيديو اللى  هنعرضه هيبين طرق الحفاظ على حرارة الطفل مستقرة

نسبة زيادة وزن الطفل

امهات كتير بتهتم بمعرفة ميزان الطفل
هل هو مناسب؛ ضعيف ولا مناسب لسنة و لا هو محتاج يتغذي اكتر.
اولا لازم نعرف ان كل طفل بيختلف عن التاني؛ يعني مش لازم كل الاطفال يكونوا نفس الوزن في نفس العمر.
في طبعا اختلافات فردية بين الاطفال.
المهم ان احنا نتابع الزيادة الشهرية للطفل الرضيع و نشوف اذا كانت مناسبة  و لا مش تمام.
اولا الطفل بيتولد في حدود 3.300 كيلو جرام لكن في أطفال بتتولد 2500 واقل و في اطفال بتتولد 4500 جرام
كل طفل بيختلف في ميزانه عن التاني في نفس العمر

- اول اربع شهور الطفل بيزيد حوالي 750 جرام كل شهر يعني بمعدل 3 كيلو اول اربع شهور.

- تاني اربع شهور بيزيد الطفل حوالي 500 جرام كل شهر
يعني بمعدل اتنين كيلو في الاربع شهور.
- اخر اربع شهور في السنة الطفل بيزيد حوالي 250 جرام كل شهر.
يعني حوالي كيلو واحد في الاربع شهور.

- بعد الطفل اما يتم السنة الطفل بيزيد بمعدل اتنين كيلو سنويا.

طبعا الاوزان دي مش لازم تكون بالظبط يعني ممكن يكون نسبة 25% فوق و تحت و يكون ده الطبيعي.
علشان كده كل طفل ممكن يختلف عن التني
دكتور حاتم فاروق  

تطعيم الروتا

يعتبر تطعيم الروتا من اهم التطعيمات الإضافية للاطفال
و الروتا ده عبارة عن فيروس بيسبب النزلات المعوية للاطفال
اللي غالبا بتكون شديدة و بتؤدي بنسبة كبيرة لحدوث جفاف للطفل او الحجز بالمستشفيات للعلاج.
علشان كده التطعيم ده مهم بنسبة كبيرة لحماية الطفل اول خمس سنوات....

الحساسية عند الطفل الحساسية عند الطفل

اطفال كتير عندهم نسبة اصابة من الحساسية
سواء كانت حساسية انف او حساسية الصدر
و بيتكرر عليهم ادوا متكررة من التعب سواء بكحة او صعوبة في التنفس و نهجان و احيانا بيحتاجوا تدخل سريع عن طريق جلسات الفاركولين و غيرها
مهم جدا ان  احنا نعرف نتعامل مع الاطفال اللي بيعانوا من المرض ده علشان نقدر نسيطر علي الدور من غير  ما  يتطور معاهم
الفيديو ده هيوضح ازاي ممكن نتعامل مع الطفل اثناء المرض و حتي في الفترات اللي الطفل كويس فيها
ازاي اقدر اني احسن المناعة بتاعته واحميه
وهل في ادوية انا محتاج امشي ابني عليها في فترة الشتاء و لا  مش محتاج
وهل في إمكانية ان ابني يخف من الحساسية نهائيا ولا هتفضل معا طول الوقت.